ننا الس ننا مش کو (our people are our mountains)

 



ننا الس ننا مش کو (our people are our mountains) 
رابعہ بلوچ

اگہ نن غلام قوم آتا آجوئی نا ہیت ءِ کین گڑا کوزہ گیر تیان آجو مننگ نا ہرا کسر ءِ او اسل اڑزان مفک۔ دا کسر ئٹ ڈکھ و دڑد ، تینا تا  جتائی و ہر وڑ نا آزموندہ بریک۔ سرسہب گڑا ہمو راج  مریک ہرا کہ ہمت و حوصلہ ئٹ تینا پرمان تے الیرہ۔ او برجاء مزاجی ئٹ ہر ہر سختی و سوری تے بخیرٹ  پارہ۔ اندا وڑ اگہ نن گنی بساؤ نا ہیت ءِ کین گنی بساؤ ہمو ملک ہرا پرتگالی سامراج آن تینا  آجوئی کن جہد کننگ ئسر او ہمو دے ہم بس کہ او آجو مسر و پرتگالی سامراج ءِ شکست  تسر۔ تینا آجوئی آن مُست اوفک اسل بھاز پدماندہ ئسر و اوفتا پدماندگی نا کچ ءِ داڑان خلنگ کینہ کہ اونا بے خوانندئی نا کچ 99 درسد ئس۔ تیوہ ملک ئٹی تا بیرہ ارا ہزار (2000) چنا خواننگ ئسر۔ 

گنی بساؤ نا آجوئی نا ہرا کہ سوچ و فکر نا بنماس ءِ تخوکا ئس او گنی نا شاری ایکٹیوسٹ و Revolutionary امیلکار کیبرال ئس۔ کیبرال ایگریکلچر انجینیئر اس ئس و او PAIGC (African party for the independence of gunea and the Cape verde) نا جنرل سیکرٹری ئس۔ او اسہ ہمت و جوزئی ءُ راہشون اس ئس او اسہ مجلس ئسے نا سوب آن سینٹرل آل لندن آ ہنا۔ کم و ود چار ہزار بندغ نا کچ ہمو مجلس ئٹ اونا گچینا ہیتا تے بنگر کہ اونا نظریہ انت ءِ و اوفتا جہد ئنا خواست نا بابت کہ او سامراج نا برخلاف عملاً انت انت عمل کرینے ولے پین ہم بھلو مخلوق اس اونا ہیت آتے بننگ خوائسکہ تو اندا سوب آن اونا ہیت آک کتابی دروشم ئٹ دن نوشتہ مسر کہ (Our people are our mountains) 

بقول کیبرال کہ "نن جنگجو اُن دا سوب آن نہ کہ ننے جنگ دوست ءِ بلکن ننے امن و ننا راج ئنا آجوئی دوست ءِ۔" اونا پاننگ ئس کہ "نن سامراج ءِ ہموتم اسہ ملک اس پاننگ کینہ ہراتم کہ او Economically و developmentally طاغتور مرے ولے پرتگال تو تینٹ یورپ نا کل آن پدماندہ و کم دیمروی ءُ ملک ئسے۔ NATO نا باسک ئس مننگ آن بیدس او اسہ دُتکی او جہاز اس ہم تینٹ جوڑ کننگ کپک۔ اندا سوب آن نن پرتگال ءِ Imperialist پاننگ کپنہ بلکن Imperial domination پاننگ کینہ اگہ او Imperial domination ءِ تو گڑا گنی ءِ اسل decolonize کننگ کپک۔" پرتگال نا ڈکٹیٹر ہموتم سالازار ئس او بے کچ حیران و شکبر ءُ لیڈر اس ئس۔ اسہ وار تینا تران ئٹی پارے کہ "Black's are illiterate" 

کیبرال 1956 ئٹی تینا سنگت آتتون اوار (6) باسکی پارٹی اس جوڑ کرے کہ اسہ گچین و پرامن ءُ وڑ  ئسے ئٹ تینا حق آتیکن ہیت کننگ کیر۔ 3 اگست 1959ء ئٹ اندا ڈاک ورکر آک تینا حق آتیکن اسہ پرامن ءُ برانز مچی ئس کشار ولے بدبختی دا مس کہ پرتگال اندا برانز نا ورندی ءِ اوفتے خرینی ئٹ تس۔ او برانز ئٹ 50 بندغ مش تا گواچی مرسہ زند آن باء تسر و کم و ود سد بندغ ٹپی مسر۔ دا تدینی آن پد کیبرال سرپد مس کہ یخین ئٹ سامراج ہچبر امن نا بولی ءِ پوہ مفک اگہ نن امن خواہنہ گڑا امن کن ہم جنگ المی ءِ و توفک ہی ننا بقاء نا رکھوک مرو و توفک نا ارفنگ ئٹی ہی ننا بروکا پیڑیک آسراتی خنور و ننا سامراج بیرہ و بیرہ توفک نا بولی ءِ سرپد مریک۔ سامراج اسل تہذیب یافتہ مفک کہ بندغ  جوانی ٹی تینا حق ئنا ہیت ءِ کے۔ 

کیبرال نا پاننگ ئس کہ ننا اولیکو مسخت تینا مخلوق ءِ Mobilize کننگ یعنی سیاسی شعور تننگ ئس و اوفتے سلاء بند جہد اکن تیار کننگ ئس۔ دا کسر ءِ  ارفنگ کن بقول کیبرال اوفتے اندن 3 سال نا کچ لگا۔PAIGC تینا اولیکو توار عمل یعنی direct action ءِ 1961ء ئٹ کرے دا سلاء بند جہد الو۔ داٹی او تنیا وی سگنل و bridges آتے زیمی کریر ولے دانا ورندی ءِ ہم پرتگال بے دادی ئٹ تس۔ بھاز آ بندغ آک کسفنگار و 300 بندغ قیذ مسر۔ کیبرال نا پاننگ ئس کہ دژمن اندا اومیت کریکہ کہ نن جلہو کننگ کن پیشن نا ملک آتیان کمک ہلینہ ولے نن تو انتس کننگ ئسون بیرہ تینا جند ئنا مخلوق نا کمک آن کرینہ۔کیبرال پارے کہ گنی بساؤ نا ڈغار ئٹ جنگل و دریاب ارے و مش اف حالانکہ مش جنگ اکن اسہ سخت ءُ قلعہ ئسے نا رکھ کروکو جاگہ ئسے ولے ننے مش اف اگہ ننے مش اف تو ننا مشک ننا بندغ آکو۔ ننا مسخت ئس کہ جہد ئٹ لس بندغ نا بشخ ہلنگ زیات آن زیات مرے۔ 

1963ء ئٹ PAIGC تینا اولیکو سلاء بند جلہو ءِ  کرے و دا جلہو Interior of Guinea یعنیGeba River آن مس و اِرا  فوجی کالونی  (Tite and Fulacunda) ہرافک Garrison پاننگرہ دا ہڑتوما تیا جلہو مس و پرتگیزی تے 40 کیمپ آن کشار۔ کیبرال پارے کہ سامراج ہرا وخت محکوم و مظلوم انگا ملک نا Urban center آتے کوزہ کیک۔ تینا لشکر ءِ تیوہ ملک ئٹ تالان کیک کہ اونا بیم ، خُلیس الس ئنا زی آ مرے و حوالکاری و ہن و بر یا سفر نا زریعت ءِ کنٹرول کیک۔ PAIGC کل دریاب آتے بند کرے تاکہ دژمن ءِ حوالکاری ٹی مسئلہ مرے و شش تُو آن گڈ پرتگال نا منسٹر ،صدر یعنی بادشاہ تینا بیان ئٹ پارے کہ PAIGC ملک ئنا 15 درسد آ کوزہ کرینے۔ 

سالا زار آن پد پرتگال نا ڈکٹیٹر Antoniode Spinola مس و وا پوسکنا پالیسی تون بس۔ کیبرال نا پاننگ ئس کہ Spinola گنی بساؤ کن سکول ، اسپتال و کسر جوڑ کرے و اندن درشان کرے کہ او گنی بساؤ و اونا بندغ تا جوانی کن خوار ءِ یعنی او (Politics of smile and blood) کننگ ئس۔ مالو تو موْن انگا (Black) تے تو بھاز خوار کریرہ ولے Spinola نا وخت ئٹی موْن انگاک ہراتم کہ مارکیٹ آ ہنارہ گڑا اولی سر جاہ تسرہ تا۔ ولدا اوفتے آفیسر و جوانو اوغدہ تسر و آرمی ٹی ہم ارفیر تا۔ اونا پاننگ ئس کہ Spinola اسل war by war والو منصوبہ اس جوڑ کرے ننا جند ئنا بندغ تے ننا برخلاف کاریم ئٹ ہیس و اسہ گچین ءُ گنی بساؤ اس جوڑ کننگ نا وعدہ ءِ کرے ولے گواچن ئٹ دن الو۔ 

ہزار سختی و سوری، ناانصافی و زلم آن بیدس PAIGC تینا جہد ءِ برجاء تخا۔ تینا آزات علاقہ غاتیٹی دیمروی کن کاریم کرے و ہمو بندغ آتے ہرا کہ سلاء بند جہد ئٹ اوار الور اوفتے کشت و کشای نا کنڈا درے تاکہ کشت و کشاری آن اوفتا output زیات آن زیات مرے انتئے کہ سلاء بند جہد اکن اوفتا معاشی وڑ ئٹ جوان مننگ ہم المی ئس۔ کیبرال جتا جتا ءُ جہانی ٹولی تتون ہیت و گپ کرے و تینا جہد ئنا مسخت ءِ مونا تا تخا تاکہ اوفتے زلم ئنا بر خلاف کمک رسینگے و او تینا راجی آجوئی ءِ اوفتا کمک ئٹ ارزان کننگ کے۔ اوفک کیبرال نا سوچ آن بھاز خوش مسر و اوفتے کمک کریر ۔ Cuba گنی بساؤ ءِ جانجوڑی کمک (medical aids) تس و سوویت یونین اوفتے توفک و سلاء تس۔ یوکرین ئٹ اوفتا بندغ تے سلاء بند جہد اکن ٹریننگ رسینگا و زالبول تے نرسنگ کن ٹریننگ رسینگا۔ 

20 جنوری 1973ء ئٹ کیبرال کونکری نا شار Capital of Independent Guinea ئٹ کسفنگا ولے داڑان گنی بساؤ نا حوصلہ و آجوئی نا جوزہ دیخہ ہم کم متو بلکن پین زیات مس و تینا جہد ءِ برجاء تخا۔ دژمن نا برخلاف جنگ ئٹ ہرا کہ game changer ئس او ہمو میزائل(strela.2 head seaking messile) ئس ہرادے سوویت یونین گنی بساؤ آ رادہ کرے۔ گنی بساؤ  گیشتر بیداری ئٹ دژمن تون مون تس و پرتگال نا کالونی تے گیشتر نسخان تا گواچی کرے و PAIGC گنی بساؤ ءِ اندا ڈول ئٹ تیوہ کوزہ کرے و پرتگال نا پوسکنا حکومت 24 ستمبر 1974 ئٹ گنی بساؤ نا آجوئی نا پڑو ءِ کرے۔
Previous Post Next Post